Societats musicalas Val Müstair

Sguard inavò sül referat public ed il lavuratori cul tema «la società i’l focus»

In sonda, als 22 favrer 2020 ha gnü lö a Lü in sala cumünala ün referat ed ün lavuratori cul tema «la società i’l focus». La gruppa d’interess cul böt da survgnir nouvs «Impuls per societats musicalas in Val Müstair» vaiva invidà a quista dieta.

Tras il di ha manà il cuntschaint cumponist, dirigent, manader da cuors ed autur da literatura professiunala Emil Wallimann dad Ennetbürgen al Lai da las Quatter Forestas.

Davo il bivgnaint tras il rapreschantant dal cumün Aldo Rodigari ha Emil Wallimann salüdà a las raduond 30 persunas preschaintas. I d’eira fich allegraivel da vezzer cha bod tuot la societats d’eiran rivadas cun plüssas commembras e plüs commembers.

Dürant bundant duos uras e mez ha sar Emil muossà sü in ün möd fich cler las schanzas e las sfidas cha las societats musicalas han hozindi. Per Emil Wallimann d’eira important da drivir a nus ils ögls per cha nus fetschan giò darcheu üna jada la puolvra da las structuras per part antiquadas. El ha muossà sü nouvas ideas e fuormas d’organisaziuns e möds da collavurar chi funcziunan in oters lös fich bain. A la fin haja lura eir amo dat diversas dumondas our dal ravuogl.

Fich allegraivel d’eira eir la partecipaziun da sar Andy Kollegger, president da l’Uniun chantunala da musica dal Grischun, chi ha eir suottastrichà in seis pled l’importanza da societats sanas e solidas pella vita culturala da nossas regiuns e dal chantun.

Cun nouv schlantsch esa lura it inavant davo giantar cun ün lavuratori per las suprastanzas ed ils respunsabels da las societats. I s’han fuormadas duos gruppas cun rapreschantants da las societats da musica ed üna gruppa cun rapreschantants dals coros. Tuot las gruppas han survgnü la lezcha da definar ils böts da l’aigna società per ils prossems 5 ons. Implü han els eir stuvü stübgiar che böts chi sun be pussibel da ragiundscher in collavuraziun cullas otras societats – üna lavur chi ha pretais discussiun e barat d’infuormaziuns.

Davo han tuot las gruppas preschantà lur böts aint il plenum ed i’s ha defini trais masüras concretas chi dessan gnir perseguitadas collavurond cullas otras societats e quai füssan:

concert dals 1. avuost cun üna fuormaziun masdada da musicantas/musicants e chantaduras/chantadurs da tuot las societats ed eir per interessats chi nu sun commembers/-bras d’üna società.
contactar la scoula da musica Engiadina Bassa Val Müstair per discuter ils temas chi occuppan a las societats. Per quist dess gnir fat il prüm üna retschercha tanter tuot las societats.
concerts d’Advent cumünaivels tanter las musicas, ils coros e la scoula da musica.

Per finir sun gnü surdattas las lezchas per la realisaziun da quists progets a las societats preschaintas cul’idea dad integrar eir a las societats chi nu d’eiran preschaintas in quist process.

Quia chattast la preschaintaziun e las masüras chi sun gnü decis.

Ün stogn grazia fich a tuots pella partecipaziun.
Nus ans allegrain sülla realisaziun dals progets insembel cullas societats.

La gruppa d’interess «Impuls per societats musicalas in Val Müstair»